പാതയോരത്ത്

പാതയോരത്തു ചുവന്നതെന്തോ
പാടപോല്‍, മെല്ലെയനങ്ങുന്നുണ്ടോ?
ആരോ വഴിയില്‍ വലിച്ചെറിഞ്ഞ
പോളിത്തീന്‍ കീശയൊന്നല്ലെന്നുണ്ടോ?

ചീറുന്ന വാഹനക്കാറ്റിനൊപ്പം
മേലേയ്ക്കുയര്‍ന്നും കറങ്ങിവീണും
വേലിമുള്ളില്‍ക്കോറി വേദനിച്ചും
വായുമുട്ടും ശ്വാസകോശമായും
എങ്ങോട്ടെന്നില്ലാതെ പാറുന്നതിനെ ഞാന്‍
എന്തിനായ് പിന്തുടരുന്നുവെന്നോ?

ഞാനതിന്‍ പിന്നാലെ പോകയാണോ,
ആയതെന്‍ പിന്നാലെ പോന്നതാണോ?
ആരോടു ചോദിക്കും, ഈ വഴിയോരത്തു
വേറൊരാളേയും ഞാന്‍ കാണുന്നില്ല.